Tanınmış təbib, Əməkdar elm xadimi, Azərbaycan Tibb Universitetinin Mikrobiologiya və immunologiya kafedrasının müdiri, AMEA-nın müxbir üzvü Zakir Qarayev ömrünün 79-cu ilində vəfat edib.
Zakir Ömər oğlu Qarayev 27 noyabr 1941-ci ildə Ermənistan SSR-in (Qərbi Azərbaycan) Dilican mahalının Göyərçin kəndində anadan olub. 1962-ci ildə N.Nərimanov adına Azərbaycan Tibb İnstitutunun Sanitariya-gigiyena fakültəsini bitirib, 1968-ci ildə Mikrobiologiya və immunologiya kafedrasında aspirantura təhsili alıb.
Z.Qarayev 1968-ci ildə tibb elmləri üzrə fəlsəfə doktoru, 1974-cü ildə tibb elmləri doktoru elmi dərəcələrini, 1990-cı ildə professor elmi adını alıb, 2014-cü ildə isə AMEA-nın müxbir üzvü seçilib.
Z.Qarayev əmək fəaliyyətinə Qərbi Azərbaycanın Göyçə mahalında (1962-1968) başlayıb. O, müxtəlif illərdə Azərbaycan Dövlət Tibb İnstitutunun Mərkəzi Elmi Tədqiqat Laboratoriyasının direktoru (1968-1974), Leninqrad Dövlət Həkimləri Təkmilləşdirmə İnstitutunun Elmi Tədqiqat Laboratoriyasında böyük elmi işçi (1974-1975), direktor (1975-1982), SSRİ Səhiyyə Nazirliyinin və Ümumdünya Səhiyyə Təşkilatının Mikologiya və Dərin Mikozlar Elmi Mərkəzinin direktoru (1982-1993) vəzifələrində çalışıb. Azərbaycan müstəqillik qazandıqdan sonra vətənə qayıdan Zakir Qarayev AR ET Mikrobiologiya, Virusologiya və İmmunologiya İnstitutunun direktoru (1993-1994), İstanbul Universiteti Tibb fakültəsinin Mikrobiologiya və immunologiya kafedrasının professoru (2001-2004), Azərbaycan Tibb Universitetinin Mikrobiologiya və immunologiya kafedrasının müdiri (2004-2020) vəzifələrində çalışıb.
Z.Qarayev müxtəlif mikroorqanizmlər (mikromisetlər, QİÇS-infeksiya virusları), radiasiya, hormonal preparatlar, antibiotiklər və s. təsirindən orqanizmdə baş verən immun çatışmazlıqların və ikincili infeksiyaların formalaşma mexanizmlərinin tədqiqinə, diaqnostika, müalicə və profilaktika tədbirlərinin təkmilləşdirilməsinə nail olub.
Z.Qarayev 300-dən çox elmi əsərin, o cümlədən 4 monoqrafiyanın müəllifi olub. Onun T.Ə.Əliyevlə birlikdə yazdığı “Tibbi mikologiya” kitabı mikoloji xəstəliklərin diaqnostikası və müalicəsi haqqında məhdud əsərlərdəndir. Alimin elmi rəhbərliyi və məsləhətçiliyi ilə 69 fəlsəfə və 20 elmlər doktoru hazırlanıb..
Z.Qarayev dünyanın bir çox nüfuzlu elmi cəmiyyət və universitetlərinin akademiki və fəxri doktoru idi.
Alim 2010-cu ildə Əməkdar elm xadimi fəxri adına, 2017-ci ildə isə AMEA-nın “Akademik Mirəsədulla Mirqasımov adına mükafatı”na layiq görülüb.
Xeyirxah və alicənab insan, istedadlı alim, ləyaqətli şəxsiyyət Zakir Qarayevin parlaq xatirəsi onu tanıyanların qəlbində daima yaşayacaq.
Allah rəhmət eləsin!
© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.